انا مش عدد

أنا مش عدد
>
> أنا من يومين طفل اتولَد
> أنا اللي راكب بسكليته
> وابويا طاير م الفرح
> أنا اللي بَظبُط في الجاكته
> وامي خايفه لا اتحسَد
>
>
>
> أنا مش رقم في كشوف غياب
> أنا اللي بَتْعَلِّم على صوابعي الحساب
> أنا اللي بيخبّي القصص جوّه الكتاب
> أنا اللي أهلي شافوا علشاني العذاب
> أنا مش عدد
>
>
>
>
> أنا مش قضية وكلنا فلان الفلاني
> أنا اللي جارتي من زمان مستنياني
> أنجح واخلّص جامعتي وجيشي وجناني
> وأقول لأبوها بحبها يا عمي اديهاني
> أنا مش عدد
>
>
>
>
> أنا مش رقم على جثتي
> أنا ماتش كورة ف حتتي
> أنا اللي راسم ع الشجر طول سكتي
> أنا اللي اخويا ياما دارى عَمْلِتِي
> أنا مش عدد
>
>
>
> أنا مش تاريخ انا مش بيان
> أنا خَبْطَة عرفاها البيبان
> انا اللي برقص ف كُل أفراح الجيران
> أنا اللي بَأْرَف لو طِلِعلي الحبَّهان
> أنا مش عدد
>
>
>
> أنا مش عَلَم وشريط حداد
> أنا مش مظاهرة ومش نشيد
> أنا كُل ليلة وكل عيد
> أمي هتِقْضيها ف سواد
> أنا مش عدد