Nagla Mustafa قصة استحمار شعب : الجزء الاول حوار فى مصر بعد 50 سنة
الحفيد : جدو .. النهاردة مدرس التاريخ طلب مننا نعمل بحث عن فترة استحمار الشعب المصرى بعد ثورة 2011 .. صحيح يا جدو كانوا بيستحمروكوا؟ مين اللى استحمركم و استحمركم ازاى ؟
الجد: ياااااااااه ثورة 2011 دى كانت ايام الجنيه
الحفيد : ايه الجنيه ده يا جدو
الجد : دا كان العملة . الفلوس اللى بنشترى بيها وقتها كانت اسمها جنيهات انا لسه عندى شوية هابقى اوريهم لك
الحفيد : مش مهم دلوقتى يا جدو عشان البحث قوللى بس مين استحمركم و استحمركم ازاى
الجد: و الله يابنى ما تعرفش ى فى حد استحمرنا و لا احنا اللى كنا حمير لوحدنا . اصل مفيش حد يقدر يستحمر 90 مليون لوحده . لازم يكونوا هما نفسهم حمير
الحفيد : عملوا ايه فيكم يعنى يا جدو؟
الجد: بص يابنى ..انت تعرف جماعة الاخوان ؟ .. اهم كانوا عايشين قبل الثورة بقالهم 80 سنة . عمرهم ما حد شاف و لا سمع عنهم حاجه وحشة ناس فى قمة الاخلاق والتدين و الاحترام لو عايز تدور على واحد منهم روح له الجامع . و الناس كانت بتقول يا بخت اللى يبقى جاره منهم . كانوا شايلين هم الشعب اللى الحكومة مش شايلة همه . ما كنتش تلاقى شارع و لا حارة فى اى منطقة ولا قرية فى مصر الا و تلاقى خدماتهم هناك يرعوا الايتام و يساعدوا الارامل يروحوا لهم واحد واحد وواحدة واحدة . كل منطقة تلاقيهم بانيين مسجد ولا مستشفى و كل عيد تلاقيهم ينظموا الصلاة و يوزعوا هدايا على العيال الصغيرة
. طب انت تعرف .. انا لما دخلت الكلية كانوا اول ناس يستقبلونى و يعرفونى كل حاجه فى الكلية و يطبعلك الجداول و يوفروا كمان كتب للناس اللى مش قادرة من كتب الدفعات اللى قبلها .
كانوا ناس خدميين من الدرجة الاولى و لوجه الله . عشان كده كانت الناس تحبهم .. النقابات المهنية زمان كانت نقابة واحدة لكل مهنة مش زى دلوقتى الف نقابة . كان الناس يختاروا الاخوان فى انتخابات النقابات عشان عارفينهم . كل مثقفين و متعلمين البلد يختاروهم مهندسين اطباء محامين صيادله .. كله كله ...
و كانت ناس تحب الحق و ميخافوش يقولوه . عشان كده الحرامى مبارك ما كانش يحبهم . كان يسجنهم من غير سبب
الحفيد : من غير سبب ازاى يا جدو ؟؟ فى سجن من غير سبب؟
الجد : يابنى كان وقتها مبارك لو عايز يعمل حاجه بيعملها . كان يطلع قانون ممنوع تشيل مطبوعات لجماعات محظورة يعنى كان اى واحد شايل ورقة عليها كلمة الله غايتنا يسجنه .. يقولك دى مطبوعات جماعة محظورة . كان مفترى الله يجحمه مطرح ما راح
الحفيد : انا كتبت الكلام ده كله يا جدو بس كل اللى انا كتبته مافيهوش حاجه فى موضوع البحث .. استحمروكم ازاى؟؟
الجد: مش فى موضوع البحث ازاى ؟؟؟ ما انت مش هتعرف استحمرونا ازاى غير لما تعرف الكلام ده
بعد الثورة ..ما كانش فى حاجه اسمها لا اخوان ولا غير اخوان . الشعب كله كان حاجه واحدة فرحان بالثورة و عايزين يبنوا البلد و يعيشوا عيشة نضيفة بعد الذل اللى شافوه ايام مبارك.. بس الثورة ماكانتش سجنت حد من الحرامية اللى كانوا بيسرقوا البلد مع حسنى مبارك . الحرامية الاول كانوا خايفين على فلوسهم و عايزين البلد تفضل فوضى شوية عشان يخرجوا اللى يخرجوه و يدارو على اى دليل على سرقتهم .. وولاد الكلب كان معاهم كل حاجه قنوات التلفزيون و الجرايد و كل حاجه .
الحفيد: و التلفزيون كان بيعملوا بيه ايه؟؟
الايام السوده دى ما كانش فيها غير التلفزيون مفيش غيره الناس بتسمع كلامه و تاخد الاخبار منه .
الحفيد: ما كانش عندكم انترنت؟
الجد : كان عندنا بس مش زى دلوقتى . كان فى البيوت بس لكن التلفزيون كان بيبقى شغال على القهاوى و فى المحلات و فى عيادات الدكاترة تلاقيه . فى اى حته تروحها .
الحفيد: ازاى يعنى؟ يعنى الحرامية دول كان عندهم قنوات و الناس التانية لا؟؟
الجد: بص يا حبيبى . االحرامية دول كان اغلب شغلهم مع اليهود . و مستشارينهم كانوا يهود . اليهود عرفوهم السر قالولهم اللى عايز يعمل اى حاجه عليه و على الاعلام تلفزيون و انترنت و جرايد يعنى .. اليهود قالولهم هو ده السر اللى خدنا بيه فلسطين .. كان العصابات الصهيونية تبقى بتقتل فى الفلسطنيين و الاعلام يقول الفلسطنيين ارهابيين . كانت الكلمة اللى عايزين ينشروها اليهود كانوا ينشروها و يخلوا العالم كله يرددها وراهم من غير ما يفهم معناها بالاعلام .. الحرامية ما كدبوش خبر كل واحد فيهم فتح له قناة ولا اتنين و طبعا مبارك كان بيدى تصاريح القنوات للحرامية مش لحد غيرهم . الثورة قامت كان كل الاعلام مع الحرامية دول . عقبال بقى ما الناس بدات تاخد بالها و يعملولهم قناة ولا اتنين بعد الثورة ... كانت قنواتهم بتبقى مش باينة وسط قنوات الحرامية . و حكاية القنوات دى كانت عايزة مصاريف كتير اوى و محدش كان معاه فلوس غير الحرامية .
الحفيد : يعنى التلفزيون و الاعلام هما اللى استحمروكم يا جدو ؟؟ ***يتبع فى الجزء الثانى
الرئيسية 
