حوار بين شاعرين, شعر عبد الرحمن بن حاشر وعلي الخوار
ابن حاشر :
وش رايك اتزوج على ام العيال** واخذ عليها يا رفيقي عديله؟
أنا معاها دوم عايش في ولوال ** ما ريحت راسي من الهم ليله
الخوار :
يا صاحبي ويش فيك متخبل خبال** هذا جزاها بعد عشرة طويله
متحمله همك من سنين طوال** وانته همومك - مثل دمك - ثقيله
ابن حاشر :
حاولت اطورها على كل الاحوال ** عشان عيني ماتدور بديله
لكنها ترفض تغير من الحال ** لو جيتها غصب .. ولو جيت حيله
الخوار :
من حقها ترفض .. وتربطك بحبال ** وتضربك لين الدم منك تسيله
ترفض معك تنزل على كل منزال ** بنت المعاني والطباع الأصيله
ابن حاشر :
كل يوم ع الشاشه صور تشرح البال ** وابحلق عيوني شرات الهبيله
ويرن قلبي كل ما يرن خلخال ** فيهن .. واحس ان الليالي بخيله
الخوار :
يا خوي لا تتبع بعد هالعمر لال ** عن لا يغرك صبغهن والجديله
من قبل ما يتجملن كائن اشكال ** خسفات .. ما فيهن ملامح جميله
ابن حاشر :
يعني خلاص اصرف نظر واطرد الفال ** واترك جنون العرس واخلي سبيله
لو كان مقدره واملك المال ** واقدر أعيش ألف عيله وعيله ؟؟
الخوار :
من مالك اصنع للوطن جند ورجال ** وعيالك اصلا هم جنوده وجيله
والله يزيدك مال .. ويزيدك عيال ** من لي غدت لك في حياتك حليله
الرئيسية 
